Tag

, ,

A vote lu corpo
vole esse scustumato
e fare cose che le fanno male
assecondo de quanno le diceno
li prufessure, li ditte antiche e l’enfermere.

A vote lu corpo
se sente tutto scurnacchiate
e magne suffritto cu vino russo a pale,
zuppe ‘e cozze,
alici ‘nturtiera e purpe alla luciana,
puparuole, pupaccelle, panzarotte,
freselle e samurchie
fatte ‘e sangue ‘o vero
ca sulo a lu pensà
te siente fremmere
da capo ‘o pere.

A vote lu corpo
se vo sentì tutto scuncecato:
primma vo’ ‘na cosa e po’ ne vo’ n’ate:
fravule, cerase,
pesche affugate,
struffole, pastiere
e aulive ‘mbuttunate,
vongole, taratufe,
taralle doce e ‘mpepate,
pasta crisciuta,
sfugliatelle ricce e frolle,
mustacciuole, fasule,
cicere e spogne affumecate
e vullute int’a ‘na cavurare nera nera
ca sulo o Pataterno ‘o sape e ‘a Maronna ‘o vere.

Tutta rrobba bbona, bella e tosta,
nun ce ne fotte ‘e quanno vene e costa,
‘a vo’
e ‘a vo’ tutta ‘nquacchiata ‘e ‘nzogna,
uoglie e vino
pe’ se scurda’ ‘a serpe
che tene ‘ncapa e ‘nsino.
Va bbuo’ se face tarde,
facimmela fernuta!

‘Sta capa cu ‘sta carna scustumate
vo primma ‘na cosa e po’ ne vo n’ate:
braciole affunnate int’o a raù,
vino ‘a vevere quanno ne vuo’ tu,
sasicce int ‘e friarielle arravugliate,
menesta ammaretate,
carcioffole arrustute,
castagne,
franchelicche e roccocò.

E po’,
e po’ sulo a tte
te vo’ e te vo’,
‘a coppa, ‘a sotta,
annanze, arete,
addo’ t’astrigne,
t’allumma,
l’abbaglie
e se fa
preta,
fino a che
passa
‘a famme
e pure ‘a sete.

 

Annunci