Tag

"VESUVIO WASH IT" [sic!]

Siente, Vesu’, statte quieto,
nun ce da’ suddisfazione
a ‘sti quatte capriciune
c’a cape sciacqua,
‘o core ‘e preta
e ‘i cerevelle sempe a dieta.

Siente, Vesu’, statte sode,
nun fa cuntente a chesti lote!

Siente,
siente, Vesu’, statte stutate,
nun vutta’ ‘ncoppa ‘o cuotto
l’acqua vulluta e ‘a lava appicciata.

Sienteme, siente Vesu’,
fallo pe’ l’aneme do Priatorio
e pe’ Gesu’;
fallo pe’ Allah e pe’ Visnù;
fallo pe’ chi t’è muorte,
pe’ chi te vive,
pe’ Santa Barbara
e p’Esaù.
Siente, siente Vesu’,
fallo pa’ barba e Mosè,
pe’ Giosuè,
pe’ Sant’Antonio,
pe’ Sant’Anna
e pe’ Grisù.
Sienteme, siente Vesu’,
fallo po’ babba’, pe’ sfugliatelle,
pe’ ‘sti femmene belle e po’ rau’.
Sienteme, siente Vesu’,
fallo pa’ Maronna,
pe’ chistu mare,
pe’ chistu cielo,
pe’ San Gennaro,
e pe’ chi vuo’ tu;
fosse pure Belzebù,
Musulline,
‘nu juventino
figlio ‘e bucchine
o Barbablù…

Duorme.
Duorme, duorme;
fatte nu bello suonno
e nun ne parlamme cchiu’
fino a che ‘o munno
nun se ne cade
e te ne cade
pure tu.


P.s. Lo so che qualche volta Ti ho evocato anch’io che ora Ti invoco; ma ero guaglione, tenevo ‘a capa fresca o troppo scarfata e stevo sempe ‘ncazzato. E po’ ‘o sanghe se mazzeca, ma nun se sputa. ‘Na cosa è si T’ho dice uno ‘e nuje e n’ata cosa è si veneno d’a fore e vonno cumannà ‘o fuoco che sta int’a panza Toje. Nun saccio si me spiego.


 

Annunci